56 Een Niej Begin 1983
Döör zatten ze dan op de verjöördag van Ali, Gerrit zien vrouwe, samen bie dokter P. H., in het St. Jozef an de Van Oldenielstroate, op vriedag de drieeëntwintigsten van Herfstmoand. De dokter zat recht tegenoaver hun. “Meneer Kuijk, zegt U het maar”. Gerrit schoat metene vol en hee wees op zien vrouwe. “Mijn man kan der niet meer tegenop, Dokter”, zei zee. “De fusie heeft hem de nek gebroken … “. En Ali vertelden oaver de drieejörige liejensweg bie een zinloze fusie bie het onderwies. Dokter H. luusterden andachtig. Ondertussen maakten hee een boel antekeningen. Toen Ali uutverteld was, volgden een lang zwiegen. “Ga eerst maar eens op de bank liggen”. De cardioloog was nieet vergèten dat Gerrit feitelijk veur de jöörlijkse controle van zien blooddruk kwam. “Honderd en dertig over tachtig; keurig met deze tabletten. Rookt U nog?” “Ik ben er helemaal mee gestopt, weddenschap met mijn directeur.” “Ik vind U een lieve man”, zei de dokter. “Ik denk dat Uw overspannenheid niet aan U ligt, maar aan de sfeer waarin U werken moet; ik zal dokter V., de zenuwarts, eens even bellen.” En hee pakten metene de telefoon. Ali en Gerrit konden gewoon meeluusteren. Gerrit kenden dokter V., want anderhalf jöör hierveur was hee oke al ens nöör hem verwezen. Hee had toen namelijk plotseling nieet meer uut zien woorden kunnen kommen. Dokter V. constateerden toen oaververmeujdheid. Hee schreef hem een lange vakantie veur, wat goed uutkwam, want de kwoale was net veur de zomervakantie begonnen. Noa diee vakantie was hee gelukkig genezen en hee mocht metene weer an het werk. Dokter V. zei toen eerlijk dat ‘oaverwerkt wèzen’ deur Gerrit veurkommen had kunnen worden: “U neemt voortdurend teveel hooi op uw vork; als een ander zijn last niet dragen kan, moet U die niet overnemen. Niemand kan de verantwoordelijkheid van zijn buurman dragen!” Gerrit had zich an de woorden van V. eholden. En dat juust was hem deur zien ‘bazen’ in ondank of-enommen!
Het telefoongesprek tussen de cardioloog en de zenuwärts duurden heel lange. Döörnoa bleef Dokter lange veur zich uutkieken. Toen vertelden hee Gerrit dat hee, dokter H., de directeur van de PABO bericht sturen zol, dat Gerrit veurlopig zieekteverlof kreeg, dat hee veur Gerrit een ofspraak emaakt had met dokter V., dat Gerrit alle schoolgebeurtenissen rondumme de fusie van de onderwiesinstituten zoo eerlijk en objectief meugelijk most beschrieven en dat stuk mee most nemmen nöör dokter V., dat Ali weer met hem mee most goan nöör dokter V. Bie dokter H., de cardioloog hoofden Gerrit pas oaver een jöör weer te kommen, want Gerrit was zoo gezond as een vis.
Toen Gerrit met zien vrouwe noa de zitting bie de cardioloog thuus kwam, nammen ze een gebakjen met koffie, neet enkeld umdat Ali jörig was! Gerrit had het geveul dat disse mergen het begin was van een nieje periode in zien onderwieslèven.
Hee ging der diee middag dalijk veur zitten en schreef driee jöör OBD-, SAD-, PA-, FUSIE-, IVB-, SLO-, SWP-, DIRECTIE- en OAVERHEIDS-ELLENDE in al hun weerdeloze onzinnigheid van zich of. Hee veulden zieneigen opgelucht, toen as hee döörmee klöör was.
An het Nederlandse deel van zien Onderwiessonnet, het Octaaf, was een ende ekommen: 1. Venenschool II, 2. OLS-Hengfprden, 3. OLS-Olst, 4. Rijksleerschool Dèventer, 5. ULO_Ceintuurbane Dèventer, 6. Nieuw Rollecate Dèventer, 7. Opleiding Kleuterleidsters Apeldoorn, 8. Fusie töt PABO Dèventer. Hee zol noe verder goan met zien Nedersaksische deel, het Sextet: 1. lectuur (luusterverhalen), 2. grammatica, 3. gedichten, 4. schriefonderwies, 5. veurdrachten veur clubs, 5. uutgaven. Hoapelijk mocht hee dat sextet oke voltooien!