45 Verkeersonderwies 1974
De stad Apeldoorn liep veurop met het regelen van het verkeersonderwies. Het onderwies veur de legere scholen wier egeven deur de gemeentepolitie. Twee heufdagenten wazzen speciaal vrie-emaakt um dat onderwies an de heuste klassen van alle legere scholen te helpen geven. Der was een speciale ruumte in-ericht met een maquette van een stad met alles derop en deran. De maquette stond in het centrum van de ruumte en der umhen wären trapsgewieze simpele zitbanken op-esteld. Der konden wel een paer klassen tegelieke zitten. Gerrit maakten der kennis mee toen hee de opdracht kreeg de anstoande kleuterleidsters op te leiden veur een onderwiescertificaat veur het verkeersonderwies an kleuters en hun olders.
Hee pakten dat zo handig meugelijk an. Hee schakelden de Vereniging veur Veilig Verkeer in um de materialen veur dat onderwies te verkriegen. Dan ging hee begin jören zeuventig an de slag. Zien precieze werkwieze wist hee noe nieet meer, möör wel dat hee bie theorie onder anderen de eisen veur de theorie van het riejexamen met zien leerlingen deurnam. Diee wazzen hem döör härtstikke dankböör veur, want ze wären allemoale rond de achttien jöör old.
Een antal keren per jöör ging hee met zien meikes nöör de verkeersruumte van de politie. De beide heufdagenten zaggen de kleuterleidsters graag kommen, want ze konden een boel dinger an diee dieerns kwiet. Allerlei praktische verkeerssituaties wieren op de maquette zicht- en tastböör emaakt. Ook in vierenzeuventig ging e weer een keer of wat. Hee had noe zelluf oke wat inbreng, want hee had een heuse opleiding evolgd veur het geven van verkeersonderwies an onderwiesopleidingen. De cursus veur ‘verkeersdocent’ was egeven deur VVN. Der wazzen driee onderdelen onderwezen: Verkeerregels en Verkeerstekens (WVR), Wegenverkeerswet, Verkeersopvoeding. Wiee het “Diploma Verkeersonderwijs M.O.” haalden, kreeg zien lessen an de onderwiesopleiding eerstegroads betaald.
Op de cursus, egeven an de P.A. in Dèventer, zatten negen cursisten: driee van de P.A. uut Dèventer, driee van de P.A. uut Apeldoorn en driee van de Kleuterleidstersopleiding uut Apeldoorn, wööronder Gerrit en zien directeur.
Der wazen acht cursusmiddagen. De lessen wieren deur de ‘Rijksoverheid’ betaald. Der wier anvankelijk nieet mee-edeeld dat der een beheurlijk zwöör examen in Utecht op de lessen volgden! En in de op een noa laatste lesse wier ezegd dat ter een examen kwam. Dat wier ofenoamen in Utrecht en enkeld de geslaagden wieren eerstegroads bevoegd. Metene opstand onder de P.A.-docenten! Döör dejen zee nieet an mee. Ze kregen hun lessen noe al eerstegroads betaald. “Als U het diploma niet haalt, bent U voortaan onbevoegd”, zei de heer K., de cursusleider, rustig. De zes heren wensten echter gin examen te doon! Ze teiden of, ze nokten of, ze gingen vort. Töt op de dag van vandage denkt Gerrit altied nog dat ze bange wazzen um of te goan! De nieje P.A.-docenten wazzen nieet zukke intelligente jonges. Diee wazzen al via de nieje lerärenopleidingen ekommen; allewel, hier wazzen toch oke olde rotten bie.
Gerrit en zien collega’s slaagden met vlag en wimpel. Ze hebt völle lol an de cursus belèèfd en oke hun leerlingen hebt ter plezier van ehad.