421. Riembewies?!
Veur de verstandige Vader Cats
*1577 - +1660
“Het geldt veur ieder mense: iej wordt older en möör older.
Iej wordt steeds sterker en groter umdat iej alsmöör greujt.
En op oew viefentwintigste dan veul iej oe volwassen.
En a’j dan oergezond bint, lik het of alles bleujt!”
Dat zei de olde Jacob Kats tegen zien moaten bie de koffie,
tien olde moaten van een jöör of negentig umtrent.
Nee, namen wordt hier nieet eneumd, want iejluu kent ze toch nieet.
En buten dat, de heren van diee soos bint helemoale nieet bekend.
“Döörnoa doode wiej veuruutgoand steeds weer een stäpken terugge;
en a’j negentig wordt, zooas ik, merk iej dat elke dag.
Uuteindelijk lig iej uutgeteld helemoale op de rugge.
Zoo verre is het bie mien nog nieet: ik bin nog bliej da’k lèven mag!
Möör mien riejbewies verleng ik nieet, ik loat mien noe wel riejen.
Wiej, olden, wordt zoo zeutjes an gevöörlijk op het wègennet!
Azze wiej een ongeluk vereurzaakt, dan mot een ander liejen!
Ik loate mien veurtoan lekker riejen; gin enkel mense drukt bie mien diee pret!”
Met zien rechterhand an ’t oor had ene moat heel goed eluusterd,
al had e meer as de hellefte van het betoog van Jacob kats verkeerd verstoan.
Möör dat het oaver het riembewies van olde Jacob handelden,
dat was hem wis en wöörachtig absoluut toch nieet ontgoan:
“Ik zal oew mooie riemen op het internet heel ärg goan missen;
Ik von’ ze mooi en iej hebt ter alderbastend völle goeien anebracht,
möör da’j veur zuk soort wärk op internet een riembewies mot hebben,
dat had ik in de värste värte toch helemoale nieet verwacht!”
Woensdag, 25 januäri 2017
