359. ERIK

> Categorie: Literatuur Gepubliceerd: maandag 13 juni 2016

Oaver Erik

of

HET KLEIN INSECTENBOEK

-----

 

A’k Erik ziee of heur’ mot ik an Godfried Bomans denken

de grote schepper van het mooie ‘klein insectenbook’

An ‘Erik’ wil ik noe nog ens wat ekstra andacht schenken

Het lag toovallig veur de hand noast mien kompjoeter op de hook

-----

Ik denke dat Godfried bewust ekoazen hef veur disse name

want Erik is een ondernemmend jungesken met een boel lef

Hee wördt deur de dierkes anezieen veur een uterst machtig heerser

allewel e veur diee leidersplaatse eigens nieet ekoazen hef

-----

De grondwoorden van ‘Erik’ bint ‘ee’, da’s ‘wet’ en ‘rijc’, is’ machtig’

’Met macht bekleed’ betèkent dus disse mooie name

De keuze van diee name vind ik gewoonweg prachtig

De name gef volledig weer hoe of de dierkes Erik zieet tesamen

Hee is hun grote leider, hun goddelijke generaal, dus oppermachtig

Oh, veur ik het vergète, ‘Erik’ is noe al lang’ oaver de tachtig

-----

Ik wete gensnieet of mien favoriete spreukskesschriever

Wel zoo dieepe oaver de name van dit beuksken hef noa-edacht

Ik wete enkeld dat hee bie al zien prachtige wärkskes

mien telkens weer op heel biezundere gedachten bracht

-----

Met “Oaver Erik” wil ik Godfried nog ens uutvoerig eren

Döörumme de eerst driee coupletten op een ampärte wiez’ ezet

En mocht iej disse vorm soms nieet direkt herkennen

twee keer vier regels en ene keer zesse vormt samen een sonnet

-----

Op het 75-ste jörige jubileum van ‘Erik of Het Klein Insectenboek’

Crödde van Niessel – 13 juni 2016

 

Wij gebruiken één cookie, die essentieel is voor het functioneren van deze website. Lees meer: Privacy & cookies.

  Ik accepteer deze cookie.
EU Cookie Directive plugin by www.channeldigital.co.uk