329. Vaert van 'De Nederlanden' - Politieke Allegorie
In de Noordzee vaert stoarig an ‘De Nederlanden’
Het schip voert fier een rood-wit-blauwe vlagge
Vandage tèvens nog een wimpel in Oranje
want de gezagvoerder, diee ik trouwens heel graag magge
viert zien verjöördag en dat geet met oranje franje
-----
Zien vrouwe steet an ’t roer en is de stuurman dus
Zee is heel sterk en höldt wel van zon maximale klus
De dochters van de kapitein meugt met hun olders mee
Ze kiekt in ’t rond met völle wille, want zee holdt van de zee
-----
Het schip vaert nieet op eigen kracht, sleepboten trek en duwt
Wel tien sleppers bint inehuurd, diee gin enkel middel schuwt
Um het grote schip veuruut te kriegen; ze gebruukt dan alle macht
Het vuurtjen extra opestoakt en dan op volle kracht
-----
Driee sleppers voert de Kruusvane heel hoge in de top
Met in golden letters ‘Onder Jezus Hoede’ der oaverduud’lijk’ op
En ene van diee driee hef op de boegspriet stoan
Gegroet Maria, loat ons nöör ’t Hiernoamoals goan
Twee sleppers hebt dezelde felrooie vlagge in de mastentop
En ene hef een vane met een rooie tomate derop
Één sleepboot knettert zoo dat het deur de ruumte davert
De vlagge van dat kleine beutjen draag blaadjes greune klaver
Dan duwt ter nog een beutjen met in de vane een dierken
En een olden met een krolse kater; diee vertrekt nooit gin spierken
De grootste sleepboot heet 'De Vrieheid'; diee zwalkt wat hen en weer
zien kapitein is heel erg kippig, zut het ageenieet meer
De laatste slepper heet Beethoven en höldt de boel slechts tègen
Diee brengt ‘De Nederlanden’ van de druppels in de règen
-----
An boord der ‘Nederlanden’ bint miljoenen lieeve mensen
en allemoale zeer vervuld van hun oprechte wensen
te lèven hier an boord in welwèèn, veurspoed, rust
en nieet te motten wieken nöör ginds an vremde kust
Möör deur het duwen en het trekken van de sleppers an het Schip
wordt een boel passagiers wel zeezieek en raakt ze in een dip
De sleppers haalt de vaert teruut deur nieet samen te werken
Dat kunt de passagiers wis en wöörachtig merken
Ze veult dat deur ’t gedoo van het getouwtrek zee straks met zien allen
an ’t ende van de vierjöörskroes tussen wal en schip zölt vallen
Dus sleppers van de ‘Nederlanden’, wèès eind’lijk ens verstandig
Slept allemoale dezelde richting in, dat lik mien wel zoo handig
-----
Koningsdag 2016 – Crödde van Niessel
