320. OAVERVAL
Der wazzen ens driee breurs en wel Jan, Piet en Klaas
Jan was de oldsten, Klaas de jongsten, möör Piet was toch de baas
Deur Piet zatten diee knapen altied volop in de ellende
Van de worst wol e het middelste en ook de beide enden
Van hem kwammen de ideeën hoe of an geld te kommen
Hoe ovve wiej dat te pakken kriegt, dat kan mien nieet verdommen
zei Piet en Jan en Klaas diee keken mekaer’ ens an
want zonder werken toch kost, drank, drugs, döör hielden ze wel van
Ze koazen veur een filiaal van onze Ie eN Gee
De ofkörting van Ik Nemme Geld en döör doo ik het wel mee
-----
Met maskers op en neppistolen gingen zee welgemoed op pad
Met een Peugeootje driee-nul-zeuven, diee hadden zee ejat
Zee rejen nöör een butenwiek: döör was een filiaal van Ing
Al hadden ze döör ageenieet een Ik-Nemm’-Geld-Rèkening
Ze sprongen uut de wagen en stoaven woest nöör binnen
De mensen schrokken zich kapot, het feestjen kon beginnen
Liggen, riep Piet, en de mensen doaken dalijk nöör de grond
Behalve dan een hele grote duutse herdershond
Diee blaften ene keer en vloag Piet nöör de strott’
En beet toen met één forse hap zien strotte kats kapot
Piet donderden achteroaver met zien kop härd op de grond
De klap was oerend härd, ‘t blood spatten in het rond
Toen lei hee döör heel stille, iej heurden hem nieet meer
De herdershond likten hem of en toen zich bie hem neer
Het personeel en het publiek, zee keken met zien allen
Zee kwammen noader en wel zoo stille, een speld ko’j heuren vallen
-----
Gin twee minuten later kwam de ambulance deran scheuren
Iej konden de sirene al heel in de verte heuren
En èven later kwam tweetonig de politie der al an
En tegen Jan en Klaas ging het ter toen wel èven van
Diee wieren in de kortste keren vakkundig neerevloerd
En èven later in de veewee epakt en heel snel ofevoerd
Piet was weer bie-ekommen en wier nöör ‘t zieekenhuus ebracht
Dat een duutse herder zoowat moois vermoch’, wiee had dat ooit edacht
Toen gingen alle tooschouwers heel opgelucht en bliej nöör huus
En Piet lei ondertussen nog steeds an het infuus
-----
Zoo maakten dus een herdershond an d’oaverval een ende
Veurkwam zoo deur zien oaverval een heleboel ellende
Hoe of het verder met de boeven ofelopen is
Dat weet ik nieet; dat heb ik allemoal’ emist
Ik mot oe trouwens eerlijk zeggen: ‘t intresseert mien ook gin reet
Hoe of ‘t met zukke voele boeven geet, het is möör da’j het weet
-----
Crödde
