318. De Kracht van het Evangelie
Wat Matthëus in de biebel ons vertelt, ken ik nog uut mien heufd
As jungesken heb ik al diee verhalen letterlijk egleufd
Ik ziee nog Jezus goan deur dat land van melk en heuning
En ik zag hem werkelijk wöör as de Boaveneerdse Keuning
Zien Liejen en zien Sterven en ook Zien Opstoan uut de Dood
en dat uut Eigen Kracht, maakten Hem alderbastend Groot
Möör toen ik veur mien studie Matthëus nog ens grondig las
ontdekten ik dat de inhold van diee verhalen meest oaverdrachtelijk was
-----
Het Liejen van de Keuning is deur Bach heel knap op muziek ezet
Döörbie is heel veurtreffelijk ook op de juuste tekst elet
Iej zieet in oew gedachten de vluchtelingen uut Azië nöör Europa trekken
De kinderen en volwassenen hun handen nöör ons um hulpe strekken
Iej zieet ze op teevee stoan an een grens, een hele woeste bèke
Zee tracht met doodsverachting diee al springend oaver te stèken
Diee bèke dut mien dan dalijk denken an de Matthäus Passion van Bach
Ik heurden zien muziek, as ik dat verschrikkelijke schouwspel zag
-----
Hier loopt de kinderen Gods, evlucht uut oorlog en ellende
As zee nieet opevangen wordt, kent hun Liejen lang gin ende
En hoapelijk kriegt zee lichamelijk en geestelijk veurtdurend Kracht nöör Kruus
En vindt zee in West-, Zuud- en Noord-Europa straks een heel veilig thuus
Loat de politici in heel het westen de Passionsmuziek met zang van Bach goan heuren
Dan oapent zee meschiens met troanen in de ogen spontoan hun herbergdeuren
Ik heb oe hier eteund wat de Passionsmuziek van Johann Bach vermag
En dat is nieet mien verdieenste, möör wel van Jezus en Matthëus en Johannes Bach
-----
Veur Goeie Vriedag en Poasen (2016)
Johannes Sebastian Bach wier geboren op 21 meert 1685 en oaverleed op 28 juli 1750
