314. Omesland
Vandage is het donderdag en wel de tiende meert
tweeduzend zestiene. De zunne schient en dat is nieet verkeerd.
Het is wel kold, möör toch bin ik an ’t wandelen egoan
Iej zieet mien noe bie “Kollukbosch”, een boerderieje, stoan
Ik schrieve dat hier heel bewust heel deftig met ceehaa
want hier woont Dèèmters Burgervader: Heer Andries Heidema
Döör geet het trouwens egeenieet umme, möör um een ander dink
iets wat ik vrogger heb belèèfd, dus een herinnerink
-----
Hier boerden tachtig jöör weerumm’ op zien gemengd bedrief
boer Kollukman, met Bram, zien zönne, een knecht en met zien wief
ik wazze tiene en ik dach’ dat Bram wat older was
’t Was een onmundig stärke keerl; dat kwam hem goed van pas
Iej vroagt oe of wat dut zon Dèèmter jonk döör toch zoo wied van huus
Nou, ik was padvinder en Kollukbos was ’s zomers echt ons thuus
Op het land van Kollukman stonden in de härfst lekkere botterknollen
diee wiej as welpen van de President Steijn natuurlijk ook wel wollen
Wiej gingen in de wèke, iej zölt dat väste wel een beetjen snappen
op het land van Bram zien vader stiekem an ’t knollen gappen
Iej mossen dan wel zörgen dat Bram oe nieet in te krage greep
want dan kree’j een ongenoadig pötjenbeulink met de zweppe ofwel zweep
-----
Ens sloape wiej weer met ons tweeën langs het botterknollenland
mien breur en ik; wiej veulden plots’ling op de scholder een jachtopzieendershand
“Zoo, jungeskes, komt möör ens mee, dan kui’j mien mooi es zeggen
wöörumme iejluu verborgen likt achter disse heggen”
“Meneer, ’t is eerlings wöör, wiej bint gek op botterknollen
En ‘t is weer knollentied, zoodadde wiej der wel heel graag wat wollen”
De bosbaas lachten schaterend: “Zoo was ’t ook in mien jeugd
Ik hebbe mien ook altied op de knollentied verheugd
Möör jonges, iejluu mot één dink wel heel goed snappen
In de knollentied hooft iejluu egens gin knollen te goan gappen
want Kollukman gef ze an kinder met een heleboel plezier
Hee gunt ze kinder net zoo graag as an de koo en an de stier
Op het knollenland stoat veur de kooien knollen meer as zat
Gin koobeest van boer Kollukman hef ooit tekort ehad
En trekt noe möör heel gauw wat knollen uut de grond
möör hold döör tegenoaver andere jonges astoeblieef de mond
En vroagt ze oeluu nöör de herkomst, wèès dan heel biedehand
en zeg dan doodgewoon “Diee komt van omesland”!
----
En lèzer, heurder, weet iej nieet wat omesland beduudt
zeuk dat met “Dèventers Idioom” dan eigens möör ens uut
-----
Donderdag, 10 meert 2016
