GDD XLIV Sterke Werkwoorden - Klasse I IE-EE-ablaut
Sterke Werkwoorden bint onregelmoatige werkwoorden diee deur klinkerwisseling binnen de stam tiedsaspecten weergeven kunt. Het voltooid deelwoord van een sterk werkwoord geet uut op –(e)n.
Hier wördt de klasse-ideling evolgd, zooas diee oke veur het Gotisch (W. Braune – K. Helm : Gotische Grammatik; Max Niemeyer Verlag / Tübingen) opesteld is; Gotisch is immers nogal verwant met Oldsaksisch. Der wordt 6 klassen onderscheiden, diee oke in het Gotisch veurkwammen, möör het Dèventers hef nog een zeuvende klasse diee het Gotisch nieet ekend hef.
Kl. I: IE – EE- ABLAUT: got. greipan (uutspr. griepan), Dèv. griepen. Onbep. wieze: griepen – Onv deelw.: griepend – Volt. deelw.: egrepen. Volt. deelw. as biev naamw. gebruukt: gegrepen (een gegrepen boef).
Tegenwoordige tied met duratief aspect: ik griepe, iej griept (griep iej), hee grip, beiden griept, wiej griept (griepe(n) wiej), iejluu griept, zeeluu griept.
Verleden tied met duratief aspect: ik grepe (greep ik), iej grepen (greep iej), hee greep, beiden grepen, wiej grepen, iejluu grepen, zeeluu grepen.
Hier volgt een boel veurbeelden uut Klaasse I:
Griepen–griepend–egrepen–griepe–griep–grip–grepe (greep)–grepen–ned. grijpen
Stiegen–stiegend–estegen–stiege–stieg–stig–stege (steeg)–stegen–ned. stijgen
In de volgende veurbeelden wordt enkeld de klinkerwisselingen anegeven.
Bieten – bit – beet – beten –ebeten; *lieden – lidt – leed – leden – eleden;*snieden – snidt – sneed – sneden – esneden;
*rieden – ridt – reed – reden – ereden;*spiejen – spiej(e) – spit – speej – spejen – espejen;
drieven – drif – dreef – dreven – edreven; zwiegen – zwig – zweeg – zwegen – ezwegen;riezen – ris – rees – rezen – erezen;
niegen – nig – neeg - negen – enegen;schienen – schient – scheen – schenen – eschenen;
blieven – blif – bleef – bleven – ebleven; lieken – lik – leek – leken – eleken;blieken – blik – bleek – bleken – ebleken;
schrieven – schrif – schreef – schreven – eschreven;kniepen – knip – kneep – knepen – eknepen;
kieken – kik – keek – keken- ekeken;spieten – spit – speet – speten – espeten; priezen – pris – prees – prezen – eprezen;
riegen – rig – reeg – regen – eregen; drieten – drit – dreet – dreten – edreten;wiezen – wis – wees – wezen – ewezen;
kwieten – kwit – kweet – kweten – ekweten;verwieten – verwit – verweet – verweten – verweten;
schieten ( ook schijten) – schit – scheet – scheten – escheten. Meugelijk is deur verwarring met ‘schieten’ in de betekenis van ‘vuren’ de uutsproake ‘schijten’ uut het Nederlands oaverenommen.*lieden, snieden, rieden, kunt oke espeld worden volgens *spiejen: *liejen, sniejen, riejen.
