54 Nieje Opleiding m.i.v. 2 juli 1983
Toen Gerrit dinzes de vierden januäri de schole inkwam, roak hee nieet zooas anders de lucht van de piepe van zien directeur. Zol diee der nieet wèèn? Hee liep gauw deur nöör de directiekamer. De deure stond lös. Gerrit zat rustig achter zien bureau. Hee was bezig met een stapel papieren diee hee zoojuust uut de busse had ehaald. “Hier, lèès iej dat eerst möör ens”, en hee schoaf de stapel deur nöör Gerrit zien kante. “Ik hebbe al esnapt dat al disse gegevens een sociaal plan worden mot, veur de fusie van onze PA’s en Kleuterleidstersopleiding. Dat mot een ve8urbeeld worden veur het hele land”. Gerrit nam de stapel op um me te nemmen. “Iej kriegt extra uren veur de opzet van het plan. Mevr. D. nemt oew uren oaver; dan hef zee der oke nog wat an.”
Gerrit vroeg Gerrit wöörumme zien piepe nieet roak. Zien baas zei dat e een weddenschap had met zien dochters oaver het roken: Wiee in drieeëntachtig het eerste van hun drieeën ging roken most de andere deelnemmers an de weddenschap allemoale een taerte geven. Gerrit vroeg dalijk of hee ook mee mocht doon, umdat hee ook estopt was. Dat mocht van zien directeur.
Diee dinsdag ging Gerrit metene an het werk met een sociaal plan veur zien collega’s. Het maken döörvan was een zwöör kärwei. Het plan most lopen töt 1990. Hee most dus prognoses maken veur zon acht jöör. Gelukkig boad zien directeur-generaal hem een boel handvatsels um hem te steunen. Het plan most goan oaver vierentwintig medewerkers in totaal. Hee mocht bie de lesurenverdeling uutgoan van extra percentages uren. Gerrit had al gauw ezieen dat hee een antal collega’s zoo an een volledige bane kon helpen, mede deur de extra studie-uren diee iedere lesgevende kreeg. An de taken van het nieet onderwiesgevende personeel mocht niee etornd worden: diee wazzen in elk geval töt negentig onder de pannen. Hee slaagden derin alle collega’s ‘binnen boord’ te holden, behalve de tiedelijk angestelden; diee kwammen op de schupstool te zitten, möör döör zatten ze al op!
In mei zat het gedeelte der veur zien schole helemoale op. Hee ging der mee nöör zien directeur. Diee bestudeerden de conclusies nauwkeurig. Hee keurden het plan goed!
Hee gaf Gerrit de road der nieet met adjunct B. en Z., van Apeldoorn en Dèventer, deroaver te proaten, want diee “könt het nieet veur mekäre kriegen”. Dat deej Gerrit dus oke nieet.
Begin Juni kwam der een noodtelefoon uut Den Haag: PA Apeldoorn en PA Dèventer kwammen der nieet uut! Als op 1 juli de fusie gin feit was, zollen alle mensen van de driee instituten opniej motten solliciteren! Gerrit Kuijk kreeg de opdracht het hele sociale plan te maken! Hee wist binnen veertien dagen alles te regelen, ten koste van … zien gezondheid. Hee wier totaal oaverspannen! Möör hee bleek met zien bemeujenissen de fusie ered te hebben!
Op woensdag, vieftien juni negentien drieeëntachtig, zatten vier directeiren, driee adjunct-directeuren, driee referendarissen en ene directeur-generaal in het Ministerie van Onderwies bie mekäre. An de order is het “Fusiestuk Kuijk”, dat was de officiële name. 124 bladziejen wieren ene veur ene deur de vergadering deur-enommen. Het stuk wier goedekeurd!
De fusie zol officieel ingoan op vriedag, 1 juli 1983. Gelukkig ging Gerrit veur diee doatum al met vakantie. Op 1 juli belden Gerrit het thuusfront. Ron, de nieje directeur, had opebeld: “De juiste datum van de fusie is 2 juli 1983. Het was de eerste keer in Gerrit zien schoollèven dat een directeur de gore lef had hem in zien vakantie notabene op te bellen! Möör gelukkig dat Gerrit met vakantie was.
