51 Integratie 1980
Met collega’s hoofden Gerrit töt de tachtiger jören nieet oaver ‘in mekäre opgoan’ of ‘härmonische samenwerking’ of ‘mekäre anvullen’ te proaten. Döör wier nieet oaver enööld . Dat dejen ze allemoale gewoon. Ieder onderwiesmense was baas in de eigen klasse, möör iej keken bie mekäre o’j wat van de anderen opstèken konden um het veur de kinder, jongeren, kleuters makkelijker te maken nöör een volgende leerfase oaver te goan. De inspectrices en inspecteurs letten bie hun schoolbezeuken döör trouwens oke altied goed op, want diee wilden trots kunnen wèzen op het onderwies in hun inspecties. In 1980 wier bie de cursussen van de SLO “INTEGRAtIE VAN KLEUTER- EN BASISONDERWIJS” de sleutelbewoording. As diee integratie in order was, dan zol het met het onderwies helemoale goed kommen. Gerrit en zien collega’s zollen dat allemoale veur mekäre motten maken! Zoo veranderden de wèkelijkse bie-eenkomsten met de begeleiders van de SLO volledig van karakter. Noe mo’j weten dat van de SLO-medewerkers der nauwelijks twee of driee bie het legere onderwies of op de kleuterschole ewerkt hadden. Ze wisten van toeten noch bloazen! De enigen diee bie het kleuteronderwies ewerkt had, was Gerrit zien vrouwelijke collega, in Apeldoorn dan, en diee in de eerste klasse van de legere schole de kinder lèzen eleerd had, was Gerrit. Hun collega’s van de PA’s in Dèventer hadden of gin les egeven an de legere schole of ze wazzen nieet leger begonnen as de vierde klasse.
De inhold van de lessen wier dus bepoald deur nieetweters van de onderste planke. Möör dat was nieet zoo erg: der kwam weinig of niks op papier. Gerrit en zien collega’s wieren met opdrachten veur veurbereidend lèzen en leren lèzen de kleuter- en legere scholen inestuurd um de integratie van diee beide schooltypen veur te bereiden. Der most uuteindelijk één schooltype kommen wöörin kleuteronderwies en leger onderwies in één gebouw ‘geïntegreerd’ wazzen! Gerrit vrèèsden het ergste veur het kleuteronderwies en de kleuterleidstersopleiding! Het wier hem dudelijk dat het hele gedoo niks anders was as een ordinaire bezunigingsoperatie. De viefenveertig kleuterleidsters-opleidingen mosten väste operuumd worden!
Hee waerschouwden zien directeur. Diee stelden de heufdinspectie van de opleidingen in kennis, möör diee reageerden nieet. Dööruut bleek dat alles al veurekoakt was!
Gerrit wist wat ter gebeuren zol: Het spöllend leren of het lerend spöllen zol nieet integreren in het leren 'leren', möör het leren 'leren' zol van de kleuter als spöller weinig oaverloaten. De geschiedenis noa tachtig leert, dat Gerrit helaas gelieke hef ekregen, al had hee dat lieever nieet ehad.
Allewel Gerrit en een boel van zien collega’s zich nieet op de kop hebt loaten zitten, ging de kleuterleidstersopleiding in Nederland ten onder. Het erge is dat nöör Gerrit zien mening de ondeskundige bestuurders as ministers van onderwies en hun departementale trawanten en zoogeneumde onderwieskundigen dat alles op hun geweten hebt.
Gerrit kon in tachtig nieet anders doon as tegengas geven. En dat hef hee eweten!