32. Teevee 1961
Gerrit zakten in het veurjöör van 1961 veur Middelnederlands en Zeventiende-eeuws van MO - B Nederlands. Toen hield hee op met studeren. De veurnaamste reden was dat zien vrouwe in verwachting was van de derden en hee wol nieet de vader wèzen diee dagens werkten en soaves met zien neuze in de boken in zien studeerkamer zat. Butendat had hee met zien uren derbie an de Kleuterkweek een redelijk inkommen, hee most zelfs het zieekenfonds uut. Hee wol zieneigen buten werktied an zien vrouwe en kinder ‘oavergeven’.
Umdat hee met de ULO-examens en zien gecommitteerdenschap bie het kleuteronderwies weer een aerdig centjen had bieverdieend, kocht hee bie Reuderink an de Gedempte Gracht, bie Loekie dus, een televisie, ‘tillevisie’ zei de echte Dèventenaer. Het was een ‘ERRES’, dus een ‘Stokvis’. Loekie kwam het ding, loodzwöör, eigenhandig installeren. Hee ontdekten dat Ali en Gerrit in hun flatjen an de Ceintuurbane 305 regelrecht op het centrale antennesysteem anesloaten konden worden. “Jullie hebben geluk”, zei hee, “Wie een nieuw toestel bij ons koopt, lever ik voor zeventig gulden een nieuwe mastantenne. Jullie hebben nu geen antenne nodig, want op het dak van jullie flatgebouw staat ter al één. Mochten jullie echter gaan verhuizen, dan lever ik als nog een nieuwe dakantenne aan jullie voor die prijs”.
Zoo konden Ali en Gerrit met hun jonges iedere oavend ‘kastjenkieken’. Gerrit keek nöör alles wat bewoag, oke nöör wat nieet bewoag, zooas het zwärtwitte testbeeld en ‘storing’. Al zat hee een halve oavend nöör ‘sneeuw’ te kieken, hee was nieet veur de bolleroete weg te sloan. De name ‘bolleroete’ is ter touwens nooit inekommen in het Dèventers en ‘kiekkaste’ oke nieet. Het wier gewoon ‘teevee’. De teevee kon mooi gebruukt worden bie het onderwies, dus kwam de ‘schoolteevee’. Gerrit maakten der dankböör gebruuk van an de ULO en an de Kweekschole. Natuurlijk keek hee met zien leerlingen nöör bieveurbeeld “De derde dinsdag in september”. Verder wieren der een boel dinger uutezonden op het gebied van ‘Oriëntatie op het Wereldgebeuren’, want de zestiger jören wären een weulige tied! Möör Ali had weinig tied um te kieken. Inmiddels was haer jongste zönne geboren en zee had met haer driee knapen genog te doon. Veur de twee oldsten was ter trouwens deur de kiekkaste genog ofleiding tegen de oavend. Töt noa het kinderprogramma van zeuven uur mochten de jonges teevee kieken. Dan gingen ze nöör bedde.
Gerrit was bliej dat hee met studeren estopt was. En dat is altied zoo ebleven.
