14. "En in mijn klas .... ."
In de vierde klasse kregen in Olst de kinder veur het eerst echt aerdrijkskunde. Met het schoolheufd, Meuleman, oaverlegden Gerrit hoe of hee dat an zol pakken. “Begint mar metene met een ‘belangstellingsonderwerp’”, roajden diee hem an. “Iej zet het mar op noa eigen inzicht, want anders volg iej mien meschiens helemoale noa en iej mot het zelluf leren”. Gerrit maakten een opzetjen: kind – ouders – woning – dorp – gemeentehuis – gebouwen – inwoners – industrieën – weteringen – water – IJssel – IJ – ( Amsterdam ) – taal – dialect – rekenen – maten en gewichten – school – onderwijs – geschiedenis Hanze – Deventer en andere IJsselsteden – IJsselmeer – visvangst – station en spoorwegen – zang en muziek.
Um reden dat hee nieet met de kinder onder wol goan in zien eigen zee van gegevens, koas hee uut dit opzetjen een stuk of wat kernwoorden. Zoo wier kind, olders, dorp bieveurbeeld GEZIN. Gebouwen, gemeentehuus, inwoners, industrieën wieren samen met water DORP en STAD. Alles wat met water te maken had wier döörbie met station en spoorwegen VERKEER en VERVOER. Toen kwam Gerrit tut de ontdekking dat hee LAND- en TUINBOUW kats vergèten had! Hee zetten het op de lieste dat ter nog èven bie.
Toen vertelden hee de kinder eerst een spannend verhaal oaver een jongen en een meiken diee an de IESSEL allerlei avonturen belèèfden. De kinder mochten toen allerlei vroagen stellen. Döörnoa zetten Gerrit ze in pären an het werk, zoodat zee mekäre helpen konden.
Ook het vak Handenärbeid schakelden hee in. De kinder mochten met stevig papier an het knippen en plakken en bouwden allerlei soorten gebouwen met verschillende soorten gevels, zooas trapgevels en klokgevels.
Het beste resultoat lèverden het taalonderwies op. Uutgoande van IJ in IJssel liet Gerrit ze tut de ontdekking kommen welke woorden allemoale stoan konden veur ‘water’. Onafhankelijk van mekäre vonden de kinder de volgende combinaties: Aa (Broabant en Drenthe), Dokkumer Ee, Goeree, Krommenie, Hollandse IJsel.
Gerrit liet de kinder een plattegrond maken van de schole um het kaertbegrip te bevorderen. Gangen, lokalen, toiletten en de spölplaatse wieren deur de kinder individueel opemoaten en de uutkomsten wieren met mekäre vergeleken.
Der wier een excursie emaakt nöör de OLBA, de vleisverwerkingsfabriek en de Olster Asfaltfabriek.
Gerrit zocht liedjes op oaver het spoor, het water, de spöltuin. “Af en toe gaan Pa en Moe met ons naar de speeltuin toe … ” was zon versken. Enkeld op dat leste vers had Meuleman een anmerking …: het was heel onpedagogisch.
Met Geschiedenis vertelden Gerrit oaver de Dèventer ‘Bergervaarders’ en oaver de ‘De Overwintering op Nova Zembla’.
Natuurlijk wieren ‘alle’ plaatsen langes de Iessel ‘eleerd’: Dieren, Doesburg, Brummen, Zutphen, Gorssel, Deventer, Diepenveen, Olst, Wijhe, Windesheim, Zwolle, Kampen.
Ook wier noa anleiding van Dèventer en Windesheim eproat oaver Geert Groote en zien Broederschap ….. . Het Vrouwenklooster in Diepenveen wier nieet vergèten.
Soms kreeg Gerrit de indruk dat hee te verre ging, möör dat was bèter as nieet ver genog.
Gerrit maakten kennis met Jan Derk Brinksma, de nieje opvoedkundeleraer an de Kweekschole in Dèventer. Hee was een vrind van Meuleman en hee wol graag bie Gerrit in de klasse kommen kieken. Dat vond Gerrit best. Brinksma bleek ene van de redacteuren te wèèn van ‘Opvoeding en Onderwijs’, een pedagogisch tiedschrift dat verniejende ideeën publiceerden onder de titel “En in mijn klas … .” Brinksma vroeg Gerrit of hee döörin oaver zien belangstellingsonderwerp schrieven wol. Dat deej Gerrit: “En in mijn klas … behandelde ik Olst”.