419. GROTE SCHOONMAAK

Veur de Dèventer Schoonfamilie

-----

In ’t olde jöör

heb ik weer troep emaakt

van binnen en van buten!

Ik ziee dat noe het lichter wordt,

ook a’k mien ogen slute.

’t Zit mien nieet lekker,

‘k veule mien voel!

Ik bin volstrekt nieet schone!

Ik mot es an de schoonmaak an

in mien eigen en

in ’t huus wöör of ik  wone.

-----

Ik kere mien in mien eigen

um mien kamer an te vègen!

Ik heb een mooie tied ekoazen,

want buten völt de règen.

’t Is vremd, möör in mien härte

begint de zunn’ te schienen,

a’k veule en ook ziee

dat de rotzooi geet verdwienen

-----

Mien innerlijk en mien kamer

Diee wordt allengs steeds lichter,

het wördt stofvriej van binnen!

Dat oademt ook völl’ lichter.

En plotseling kump ter in mien

iets van een niej beginnen.

En dan schieet onverwachts

wat regels mien te binnen:

Het nieje jöör mag zich

noe wieter wel ontrollen!

Ik hoape noa diss’ Grote Schoonmaak

het van binnen schoon’ te hollen!

-----

Crödde van Niessel

op donderdag, 12-01-2017

 

• Vorige
• Volgende