325. De Haze - Veur Marianne Thieme
De haze is een heel mooi dier met hele lange lèpels
Zien vruiwken neume wiej een moer; zee hef dan ook de tèpels
Het menneken heet rammelaer en hee zit heel kordoat
te knagen an de sukerbieten, de knollen en de sloat
Zien name beduudt feitelijk gries of bèter brunig gries
As e recht oaverende zit, dan kik e heel ärg wies
Oh joa, een haze is haso in het hele olde Fries
Hee kan köttels as dröpkes scheiten en diee smaakt heel ärg vies
Hee zat, toen der een boel knollen wazzen, graag in het knollenland
te rammelen op zien trommel en dan float e heel pärmant
As ze dan op hem schoaten, had e het wel ehad
Hee ging der gauw vandeur, hee koas het hazepad
Helaas veur hem krig e wel ens ‘n schot hagel in de donder
Dan maakt e een hele grote sprong en geet veurgoed ten onder
De jachthond kump dan anesneld um hem goed beet te griepen
En veur e dan egèten wördt, mot e eerst een tiedje riepen
En zon geriepte haze, dat zal oe väste wel verbazen
dat neumt de kenners van de koakkunst een adellijke haze
En dat kump deur verroting, dat is zeker en gewis
Ze zekt dat e deur dat proces heel ärg veredeld is
De poten van dit dier he’k wel ens leggers heuren neumen
Het wier ezegd deur ene diee zien eigen jachtkennis reumden
Ik hebbe later van een bekende dierenärts eheurd
dat legger een ontstèking an de hakke is, wat nog wel ens gebeurd
De haze maakt een leger, zoomöör in ‘t oapen veld
Döör lig e en döör wärpt e de jongen met geweld
Dat leger van liggen en van leggen kump, dat had iej nieet verwacht
Dat had ik trouwens ook van oe helemoal’ nieet edacht
Een katte is een dakhaze en een zandhaze een soldoat
Dat bint dus lopende infantristen diee achter de tanks angoat
En mensen diee der gauw vandeur goat, het zal oe nieet verbazen
Dat neume wiej in Nederland deurgoans gewoon angsthazen
Loa’k èven zieen, heb ik meschiens nog wat vergèten
Joa, hazepèper mo’j nieet èten: dat is hoast nieet te vrèten
En moch’ iej soms ens bint goan denken dat ik gek bin op ons wild
Dan kan ik oe heel eerlijk zeggen, ‘k heb nooit gin haze ‘vild
Ik zal oe nog terbie vertellen, en da’s ’t laatste wa’k hier rieme
Wildjagers mot ik nieet, geef mien möör oe, Maranne Thieme
Iej bint een politieke leidster veur wiee dat nog nieet wisten
een echte en oprechte en terechte onvermeujde dierenactiviste
-----
Nöör “De Schoolmeester”, pseudoniem van Gerrit van de Linde (1808 – 1858)
-----
Crödde van Niessel, pseudoniem van Gerrit W. Kuijk, geboren in 1927
-----
Woensdag, 20sten van Grösmoand 2016
