323. 't Is mien toch wat ... - Veur Herman Finkers
323. ‘t Is mien toch wat …
Veur Herman Finkers
De katte van de buren is driee jöör vot ewest
Ze dach’en dat hun poes kats plat erejen was
En op een mooie märn kwam e weer de keuken in
Begon zich schoon te likken en leek heel goed te pas
Toen rolden ze haereigen op op haer vertrouwde plekke
Joa, joa, ’t is mien toch wat, gewoonweg van de gekke
-----
Het huus mos niej behangen worden, ‘t behangsel mos ter of
Dat ging met een soort stoommesjientjen, dat fiene druppels spreujden
Zoo vloagen hele lappen van het behang der of en zonder völle stof
Tötdat de olde opa zich ter ensklaps mee bemeujden
Hol op met dat vernieelen van diee eeuwenolde middeleeuwse mure
’t Behangsel höldt dit bouwwerk enkeld nog met meujte oaverende
Straks stort het hele zaakjen in: de muren bint totaal verpulverd en verrot
Iejluu brengt anderen en oeweigen alleen möör in opperste ellende
Der wier nieet nöör hem eluusterd en ze gingen onverdroaten deur
Toen stortten het mooie grachtenpand met völ geraas kats in mekäre
Het was een akelig en rommelend angstanjagend kriegsgeheur
Uut het café keek d’olde opa too met in zien hand een olde kläre
Hee hief het glas en zei: Op diee puunhoop diee der lig op diee gelieefde plekke
Joa, joa, ’t Is mien toch wat, gewoonweg van de gekke
-----
Een domineer uut Dèventer diee most in Battum plotseling prèken
Möör de olde prèke diee e holden wol, had e helemoal vergèten
Oaver ‘Alle Zegen komt van Boven’ zol hee zoo graag goan sprèken’
Möör noa de eerste zinne van de prèke, bleef hee deur een blackout stèken
En toen vloag plots een witte doeve dwärs deur de kärke hen
Vloag règelrecht nöör ‘Dom’neer’ too, zetten haereigen op zien heufd
En döörin vond de prèdiker zien nieje inspiratie, begon te prèken en
A’k der eigens nieet bie waer’ ewest, ik had het nieet egleufd
Veur de voeste sprak e weg, bedacht zien prèke ter plekke
Joa. Joa, ’t is mien toch wat, gewoonweg van de gekke
-----
‘Van heuren zeggen enzoovoort’ leidt töt prachtige verhalen
En a’j döörmee de boer opgoat, dan trek iej volle zalen
Iej könt de mensen met oew woorden de dinger loaten zieen en
De grappenmakers van beroop, könt ter schatten mee verdieenen
Ze trekt de theaters langes, jöörlijks een niej program
Verdieent döörmee wel duzend keer een meer dan goed belegde boterham
Dat mag, want wiej genieet van hun pröötjes en van hun lekker bekken
Joa, joa, ’t is mien toch wat, gewoonweg van de gekke
Oh joa, veur ‘k vergète, Herman Finkers kump and’re wekke!
-----
Crödde – Diepenveen, 15-04-2016.
