Goodgoan
In disse herfst met zien rieke nöttenoogst, zit mien eekhoorn, mien kateker weer vake in mien walnötte. Ik genieete dervan, zooas hiee tekeer gieet, ene veur oe en ene veur mien. Wieluu kriegt op disse wieze ons pärt ruumschoots mee. En dan inens bin ik weer diee klimmer. Ik zitte inens boaven in diee ene stamme diee nog van mien nötte oaver is. Ik kieke oaver Salland, de Achterhook, Twente, Drenthe, Oost-Veluwe en ik probere te zieen woarof al mien nötten hen-egoan bint. Moar dat kan ik nieet zieen! Ik wete dat ik een boel nötten weerumme heb ontvangen, vake met een brieefken derbie woarop stond watveur soort nötte het was. Moar alle ontvangers hebt nieet ereageerd. Ziee gavven gin sjoeche. Soms wieren der wel 50.000 per keer estuurd an de leazers. Of ze mien nötten preufden? Mien nötten, mot iej mien ens heuren. Ik gapten ze eigens uut de boom! Toch waeren het mien nötten. Zelf heb ik ze op-epoetst, in-ekerfd, en noar de leaverancier ebracht. Diee wier dan de eigenaer van de nötten. As hiee diee verstuurd had, kreeg ik ze noa een half joar weerumme. Hoe-of dat kan, weet' ik oke nieet, moar zo werkt dat in diee nöttenhandel. Auteursrecht heet dat, geleuv' ik.
Ik kieke um mien hen. De boom is nog lange nieet löag, der zit nog minstens duzend nötten an. Diee krake ik allemoale nieet meer. Ik hebbe der wel zin an, want hoe zol ik anders diee eerste vierhonderd hebben kunnen kraken. En der waeren härden bie, dat verzeker ik oeluu.
Noe goa ik dermee uutscheien. Ik hebbe nog een heleboel leuke andere vruchten an andere struken ezieen! Diee goa ik noe eaten en . verzamelen. En as ik der genog bie mekaere heb ezocht, goa ik ze uutgeven an wiee ze hebben wilt. Zolt der luu ewest hebben, diee mien eigen nötten oke verzameld hebt? As ziee dat edoan hebt, hebt ze een book bie mekaere van zon zeshonderd bladzieden. En nog wel een book metzonder leugens. Nou ja... ! Ik kieke nog ens goed oaver mien werkgebieed. Zollen diee leazers doar ook wel nötten bekerven, of zollen ziee nieet weten hoe-of dat mot? Loat ik ze ens een beetjen helpen. Ik schrappe in mien laatste nötte de groeven zoo, dat het helemoale een `platte' nötte wördt. Dan kan elk mense zieneigen maniere van kerven vergelieken an de mienden. Dan kan iedere `graveur', iedere `schriever' zien eigen nötten bewerken of ze net als Tinus van het Slyck helemoale zelf maken. Mooi zol het weazen as de maniere van schrieven, het 'spellen', een beetjen gelieke was en wat op Hollandse nötten leek! Want dan kan elk mense diee nötte makkelijk vinden of 'leazen'.
Ik stoa te lachen veur de roete as de eekhoorn verdwient. Ik bin weer Gerrit Kuijk, Gerrit de Fantast, zooas ze mien vrogger neumden. En ik nemme ofscheid van mien leazers.
Lieeve Leazers,
Ik stoppe met mien rubriek, nieet wiel het mot, moar döarumme...! Dat laatste vulle ik op mien eigenwieze wieze in. Met 'Taal' bint zoovölle mooie dinger te doon, dat ik nog wel driee leavens neudig hebbe um diee allemoale te volbrengen. Iejluu weet stuk veur stuk wat 'goed' of 'good' betekent, dat hoof ik nieet uut te leggen. Al het positieve is 'good'. Datzelfde geldt veur 'gaan' of 'goan'. In dat laatste zit völle beweaging. En beweaging is leaven. Een boel vrinden heb ik bie mien gang deur de 'Taal' goandeweggens verloren. Doar wil ik toch eaven bie stillestoan. Verscheidenen hebt mien langeder as zeuven en een half joar evolgd. Der bint der oke diee mien of en too lazzen. Zoo mooi was het noe ook allemooale nieet. En de meeste mensen gunt huneigen weinig tied umme te leazen. Ik bedanke iederene härtelijk veur de belangstelling in mien stukskes en misschiens zieet wie mekaere nog ens. Der bin der genog diee mien herkent deur mien kop in de krante.
Goodgoan!
Gerrit Kuijk
